ٹی ٹوئنٹی ورلڈ کپ 2026 میں مبینہ فکسنگ کا شور: آئی سی سی کی کینیڈا بمقابلہ نیوزی لینڈ میچ کی تحقیقات

دبئی: انٹرنیشنل کرکٹ کونسل (آئی سی سی) کے اینٹی کرپشن یونٹ نے ٹی ٹوئنٹی ورلڈ کپ 2026 کے دوران کینیڈا اور نیوزی لینڈ کے درمیان کھیلے گئے میچ کو مشکوک قرار دیتے ہوئے باقاعدہ تحقیقات کا آغاز کر دیا ہے۔

کینیڈین دستاویزی فلم ‘کرپشن، کرائم اینڈ کرکٹ’ میں کیے گئے انکشافات کے مطابق، اس میچ کا ایک مخصوص اوور شدید شکوک و شبہات کی زد میں ہے جس میں کپتان دلپریت باجوہ نے غیر معمولی بولنگ کی اور غیر ضروری طور پر اضافی رنز دیے۔ آئی سی سی حکام ان ویڈیوز اور ڈیٹا کا باریک بینی سے جائزہ لے رہے ہیں۔

صرف میچ ہی نہیں بلکہ کرکٹ کینیڈا کی انتظامیہ بھی کٹہرے میں کھڑی ہے۔ سابق کوچ خرم چوہان کی ایک مبینہ آڈیو ریکارڈنگ سامنے آئی ہے جس میں بورڈ حکام کی جانب سے ٹیم سلیکشن پر دباؤ ڈالنے کا ذکر ہے۔ اس کے علاوہ سابق کوچ پبڈو دسانائیکے نے بھی الزام لگایا ہے کہ انہیں مخصوص کھلاڑیوں کو کھلانے پر مجبور کیا گیا اور انکار کی صورت میں نوکری سے نکالنے کی دھمکیاں دی گئیں۔

آئی سی سی اینٹی کرپشن یونٹ کا کہنا ہے کہ وہ جاری تحقیقات پر فی الحال کوئی حتمی تبصرہ نہیں کر سکتے، تاہم کھیل کی شفافیت پر سمجھوتہ نہیں کیا جائے گا۔ کرکٹ کینیڈا کو اس وقت مالی بے ضابطگیوں اور کھلاڑیوں کے واجبات کی عدم ادائیگی جیسے سنگین انتظامی بحرانوں کا بھی سامنا ہے۔

رپورٹ: ادارہ اردو ڈیسک | ماخذ: UrduDesk.com