دنیا کی سب سے بڑی چاندی کی اینٹ کی نقاب کشائی
ویب ڈیسک
November 28, 2025
facebook | twitter | whatsup | mail
دبئی:
متحدہ عرب امارات نے ایک اور عالمی ریکارڈ قائم کرتے ہوئے دنیا کی سب سے بڑی چاندی کی اینٹ کی نقاب کشائی کر دی۔ دبئی ملٹی کموڈٹیز سینٹر (DMCC) کی جانب سے متعارف کرائی گئی اس دیوقامت چاندی کی اینٹ کا وزن 1,971 کلوگرام ہے، جو علامتی طور پر 1971 میں قائم ہونے والے متحدہ عرب امارات کے سالِ تاسیس کی نمائندگی کرتا ہے۔
یہ منفرد اینٹ گنیز ورلڈ ریکارڈ میں شامل کر لی گئی ہے اور عالمی سطح پر دھاتوں کی انڈسٹری کے لیے ایک اہم سنگِ میل تصور کی جا رہی ہے۔
عرب میڈیا کے مطابق ریکارڈ بنانے والی اس چاندی کی اینٹ کو 24 نومبر کو Dubai Precious Metals Conference کے دوران پیش کیا گیا، جس میں دنیا بھر سے قیمتی دھاتوں کے ماہرین اور سرمایہ کاروں نے شرکت کی۔
DMCC کے ایگزیکٹو چیئرمین اور سی ای او احمد بن سلیم نے کہا کہ کانفرنس کے 13ویں ایڈیشن میں کئی اہم کامیابیاں حاصل کی گئیں، تاہم سب سے نمایاں یہ عظیم الشان چاندی کی اینٹ رہی جس کی لمبائی 1.3 میٹر ہے اور اسے منفرد کاریگری کا نمونہ قرار دیا جا رہا ہے۔
حکام کے مطابق اس اینگوٹ کا وزن نہ صرف امارات کی بنیاد کے سال کو ظاہر کرتا ہے بلکہ یہ ملک کی اختراع، شاندار کاریگری اور عالمی سطح پر بڑھتے ہوئے اثر و رسوخ کا بھی استعارہ ہے۔
About the Author
