urdudesk 
سی پی پی اے کی درخواست، نیپرا 31 دسمبر کو فیصلہ کرے گا
اسلام آباد | اردو ڈیسک | 17 دسمبر 2025
ملک بھر میں بجلی استعمال کرنے والے صارفین کے لیے اچھی خبر سامنے آئی ہے، جہاں بجلی کی فی یونٹ قیمت میں کمی کا امکان ظاہر کیا جا رہا ہے۔
سینٹرل پاور پرچیزنگ ایجنسی (سی پی پی اے) نے نومبر کی ماہانہ فیول ایڈجسٹمنٹ کے تحت بجلی کی قیمت کم کرنے کی درخواست نیشنل الیکٹرک ریگولیٹری اتھارٹی (نیپرا) میں جمع کرا دی ہے۔ درخواست منظور ہونے کی صورت میں صارفین کو 72 پیسے فی یونٹ تک ریلیف مل سکتا ہے۔
نیپرا اس معاملے پر 31 دسمبر کو سماعت کرے گی، جس کے بعد حتمی فیصلہ سامنے آئے گا۔
درخواست میں مؤقف اختیار کیا گیا ہے کہ نومبر کے دوران بجلی کی مجموعی پیداوار اور ترسیل کے اخراجات میں کمی ریکارڈ کی گئی۔ فراہم کردہ اعداد و شمار کے مطابق، نومبر میں ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی، جبکہ بجلی کی اوسط لاگت 6 روپے 16 پیسے فی یونٹ رہی۔
دستاویزات کے مطابق بجلی کی پیداوار کے ذرائع میں پانی، مقامی و درآمدی کوئلہ، گیس، ایل این جی اور جوہری ایندھن شامل رہے۔ سب سے زیادہ بجلی پانی سے پیدا کی گئی، جبکہ جوہری توانائی بھی پیداوار کا نمایاں حصہ رہی۔
اگر نیپرا نے سی پی پی اے کی درخواست منظور کر لی تو بجلی صارفین کو آنے والے بلوں میں واضح ریلیف ملنے کا امکان ہے۔
About The Author
