بھارتی پنجاب کے وزیر اعلیٰ بھگونت مان (Bhagwant Mann)
امرتسر (ویب ڈیسک، اردو ڈیسک) بھارتی ریاست پنجاب کے عوام کیلیے حکومت نے بڑے ریلیف کا اعلان کر دیا ہے۔ وزیر اعلیٰ پنجاب بھگونت مان نے نئی بجلی پالیسی کے تحت گھریلو صارفین کیلیے 600 یونٹ تک مفت بجلی دینے کا باقاعدہ اعلان کیا ہے۔
بھارتی میڈیا رپورٹس کے مطابق اس نئی اور عوام دوست بجلی پالیسی کی سب سے خاص بات یہ ہے کہ اب گھریلو صارفین مفت بجلی کی سہولت کے ساتھ ساتھ بلا جھجھک ایئر کنڈیشنر (AC) بھی استعمال کر سکیں گے۔ حکومت نے اس پالیسی کو اس انداز میں ترتیب دیا ہے جس سے عوام کو تو بھرپور ریلیف ملے گا، لیکن ساتھ ہی یہ بات بھی یقینی بنائی گئی ہے کہ سرکاری محکمہ بجلی کسی قسم کے مالی نقصان یا خسارے کا شکار نہ ہو۔
نئی بجلی پالیسی کے تحت صارفین اے سی (AC) بھی چلا سکیں گے، بجلی کے محکمے کو نقصان سے بچانے کیلیے 540 میگاواٹ کا پاور پلانٹ بھی خرید لیا گیا: بھارتی میڈیا
وزیر اعلیٰ پنجاب بھگونت مان نے میڈیا کو تفصیلات بتاتے ہوئے دعویٰ کیا کہ ریاست میں توانائی کی پیداوار اور سپلائی پر مضبوط کنٹرول حاصل کرنے کیلیے ایک بڑا قدم اٹھایا گیا ہے۔ حکومت نے 540 میگاواٹ کا ایک نجی تھرمل پاور پلانٹ 1080 کروڑ روپے کی خطیر رقم سے خرید کر سرکاری تحویل میں لے لیا ہے۔
انہوں نے مزید بتایا کہ بجلی کی پیداواری لاگت کو کم سے کم سطح پر لانے کیلیے کوئلے کے ذریعے بجلی بنانے کے عمل کو مزید تیز کیا جا رہا ہے اور اس منصوبے پر کام تیزی سے جاری ہے، تاکہ عوام کو مستقل اور سستی بجلی کی فراہمی ممکن بنائی جا سکے۔
