مڈل سے ماسٹرز پاس نوجوانوں کے لیے پاک فوج میں بھرتی کا سنہری موقع
فوجی حکام کی جانب سے جاری کردہ اشتہار کے مطابق ان آسامیوں کے لیے آن لائن اور سینٹر کے ذریعے رجسٹریشن اور بھرتی کا عمل یکم ستمبر 2026 سے شروع ہو کر 23 نومبر 2026 تک جاری رہے گا۔ اہلیت کی شرط کے مطابق پاکستان، آزاد کشمیر اور گلگت بلتستان کے شادی شدہ اور غیر شادی شدہ مرد شہری درخواست دینے کے اہل ہوں گے۔ واضح رہے کہ یہ تمام آسامیاں پینشن ایبل ہیں، جبکہ اقلیتوں کے لیے بھی خصوصی کوٹہ مختص کیا گیا ہے۔
کن آسامیوں پر بھرتی کی جا رہی ہے؟
اشتہار کے مطابق درج ذیل آسامیوں کے لیے درخواستیں طلب کی گئی ہیں:
جونیئر کمیشنڈ آفیسر (نائب خطیب)
سپاہی جنرل ڈیوٹی
سپاہی ٹیکنیکل
سپاہی ملٹری پولیس
سپاہی ڈرائیور
سپاہی کلرک
سپاہی کک
سینیٹری ورکر
عمر کی حد اور رعایات
عمر کی حد کا تعین 24 نومبر 2026 کی بنیاد پر کیا جائے گا۔ نائب خطیب کے امیدواران کی عمر 20 سے 28 سال کے درمیان ہونی چاہیے، جبکہ پہلے سے فوج میں سروس دینے والے امیدواران کے لیے عمر کی حد 22 سے 35 سال اور سروس ایک سے 16 سال مقرر کی گئی ہے۔ سپاہی کی تمام ٹریڈز کے لیے عمر 17 سے 23 سال جبکہ سینیٹری ورکر کے لیے 17 سے 35 سال رکھی گئی ہے۔
سپاہی ٹریڈز کے امیدواران کے لیے عمر کی بالائی حد میں درج ذیل خصوصی رعایات بھی دی جائیں گی:
گریجویٹ یا اس سے زائد تعلیم یافتہ امیدواران کو ایک سال کی رعایت حاصل ہوگی۔
شہداء اور جنگ کے دوران زخمی ہونے والوں کے لواحقین، اور ڈرائیونگ لائسنس رکھنے والے امیدواران کو دو سال تک کی رعایت دی جائے گی، اور ایسے امیدواران کو بھرتی میں ترجیح بھی حاصل ہوگی۔
بلوچستان، خیبرپختونخوا کے صرف ضم شدہ اضلاع اور گلگت بلتستان سے تعلق رکھنے والے امیدواران تین سال تک کی عمری رعایت حاصل کر سکیں گے۔
قد کی شرائط
قد کی کم از کم حد آسامی کے لحاظ سے مختلف رکھی گئی ہے: نائب خطیب کے لیے 5 فٹ 3 انچ (160 سینٹی میٹر)، سپاہی جنرل ڈیوٹی، ڈرائیور اور ٹیکنیکل کے لیے 5 فٹ 6 انچ (167.5 سینٹی میٹر)، سپاہی ملٹری پولیس کے لیے 5 فٹ 8 انچ (173 سینٹی میٹر)، جبکہ سپاہی کلرک، کک اور سینیٹری ورکر کے لیے 5 فٹ 3 انچ (160 سینٹی میٹر) مقرر کی گئی ہے۔ بلوچستان، خیبرپختونخوا کے صرف ضم شدہ اضلاع اور گلگت بلتستان کے امیدواران کو (سپاہی ملٹری پولیس، سپاہی کلرک اور سینیٹری ورکر کے سوا) قد میں دو انچ کی رعایت بھی دی جائے گی۔
تعلیمی قابلیت
ہر آسامی کے لیے تعلیمی قابلیت کا الگ معیار رکھا گیا ہے:
نائب خطیب کے امیدوار کے پاس ہائیر ایجوکیشن کمیشن سے تصدیق شدہ دینی مدرسے کی سند (درس نظامی) کے ساتھ ایف اے یا ایف ایس سی یا مساوی تعلیم ہونی چاہیے۔ عربی زبان میں بول چال کی مہارت لازمی جزو ہے، جبکہ قرأت اور حفظ کو اضافی قابلیت سمجھا جائے گا۔
سپاہی جنرل ڈیوٹی، ڈرائیور اور ملٹری پولیس کے لیے کم از کم میٹرک مطلوب ہے، تاہم بلوچستان، خیبرپختونخوا کے ضم شدہ اضلاع اور شہداء کے بچوں کے لیے (سپاہی ملٹری پولیس کے سوا) کم از کم مڈل بھی قابل قبول ہوگا۔ سپاہی کلرک کے لیے کم از کم انٹرمیڈیٹ (سی گریڈ) درکار ہے جبکہ بلوچستان، خیبرپختونخوا کے ضم شدہ اضلاع اور گلگت بلتستان کے امیدواران کے لیے انٹرمیڈیٹ (ڈی گریڈ) قابل قبول ہوگا؛ کمپیوٹر ڈپلومہ اور اعلیٰ تعلیم یافتہ امیدواران کو ترجیح دی جائے گی۔ سپاہی ٹیکنیکل کے لیے کم از کم میٹرک سائنس (بی گریڈ) مطلوب ہے اور اعلیٰ تعلیم یافتہ افراد کو ترجیح حاصل ہوگی۔ سپاہی کک کے لیے کم از کم مڈل تعلیم کافی ہے، البتہ کوکنگ کا تجربہ رکھنے والوں کو ترجیح دی جائے گی۔ سینیٹری ورکر کی آسامی کے لیے ناخواندہ افراد بھی درخواست دے سکتے ہیں، تاہم زیادہ سے زیادہ پرائمری تک تعلیم یافتہ افراد ہی قابل قبول ہوں گے۔
درکار دستاویزات
امیدواران کو رجسٹریشن کے وقت درج ذیل دستاویزات ساتھ رکھنا ہوں گی:
اصل تعلیمی اسناد بمعہ دو عدد تصدیق شدہ فوٹو کاپیاں
چار عدد پاسپورٹ سائز تصاویر
کمپیوٹرائزڈ قومی شناختی کارڈ
ڈومیسائل اور رہائشی سرٹیفکیٹ (آزاد کشمیر کے امیدواران کے لیے)
عمر یا قد میں رعایت کے حامل امیدواران کے لیے متعلقہ ثبوتی کاغذات
رجسٹریشن کیسے کروائیں؟
نائب خطیب کے خواہشمند امیدوار اپنی درخواست مقررہ فارم پر درج ذیل آرمی سلیکشن اینڈ ریکروٹمنٹ سینٹرز سے یکم ستمبر سے 23 نومبر 2026 کے دوران حاصل اور جمع کروا سکتے ہیں: گلگت، پشاور، ڈی آئی خان، مظفرآباد، راولپنڈی، لاہور، فیصل آباد، ملتان، کوئٹہ، خضدار، تربت، بنوں، عقل، حیدرآباد اور کراچی۔
سپاہی کی تمام ٹریڈز کے امیدواران یکم ستمبر سے 16 نومبر 2026 تک آفیشل ویب سائٹ www.joinpakarmy.gov.pk کے ذریعے آن لائن رجسٹریشن کروا سکتے ہیں۔ واضح رہے کہ آن لائن رجسٹریشن لازمی نہیں ہے — خواہشمند امیدوار یکم ستمبر سے 23 نومبر 2026 تک اپنے قریبی آرمی سلیکشن اینڈ ریکروٹمنٹ آفس جا کر بھی رجسٹریشن کروا سکتے ہیں۔ رجسٹریشن مکمل ہونے کے بعد امیدواران کو تحریری ٹیسٹ، فزیکل ٹیسٹ اور انٹرویو سمیت مختلف امتحانی مراحل سے گزارا جائے گا۔
ملازمت کی مراعات اور انتخابی طریقہ کار سے متعلق مزید تفصیلات جاننے کے خواہشمند افراد اپنے قریبی آرمی سلیکشن اینڈ ریکروٹمنٹ آفس سے رابطہ کر سکتے ہیں یا آفیشل ویب سائٹ www.joinpakarmy.gov.pk ملاحظہ کر سکتے ہیں۔
