بوسٹن میراتھون 2026: پاکستانی رنرز نے میدان مار لیا، کانسٹیبل محمد امجد تیز ترین پاکستانی قرار
بوسٹن (اردو ڈیسک): دنیا کی قدیم ترین اور باوقار ترین "بوسٹن میراتھون 2026” میں پاکستانی رنرز نے اپنی شاندار کارکردگی سے عالمی سطح پر ملک کا سر فخر سے بلند کر دیا۔ پاکستان اور بیرون ملک مقیم 13 پاکستانیوں نے اس مشکل ترین دوڑ کو کامیابی سے مکمل کیا، جبکہ 4 رنرز نے ‘سکس اسٹار فنشر’ کا عالمی اعزاز بھی حاصل کر لیا۔
کراچی پولیس کے کانسٹیبل محمد امجد علی نے سب کو حیران کر دیا اور 2 گھنٹے 42 منٹ اور 45 سیکنڈ میں ریس مکمل کر کے اس سال کے تیز ترین پاکستانی رنر ہونے کا اعزاز حاصل کیا۔ اپنی پہلی ورلڈ میجر میراتھون کے تجربے کے بارے میں بات کرتے ہوئے امجد کا کہنا تھا کہ ٹریک پر چڑھائی اور اترائی کے مراحل کافی چیلنجنگ تھے، لیکن وہ اپنی کارکردگی سے مطمئن ہیں اور ان تمام لوگوں کے شکر گزار ہیں جنہوں نے اس سفر میں ان کا ساتھ دیا۔
اس سال کی بوسٹن میراتھون پاکستانی رننگ کمیونٹی کے لیے اس لیے بھی یادگار رہی کہ مزید چار رنرز نے ‘ایبٹ ورلڈ میراتھون میجرز’ کا اپنا ‘سکس اسٹار’ سفر مکمل کر لیا۔ ان میں درج ذیل نام شامل ہیں:
ڈاکٹر جہانزیب مغل (کراچی)
نوشیروان علی (کراچی)
بلال احسن (اسلام آباد)
محمد فصیح صالح (ناروے)
بلال احسن نے گھٹنے کی تکلیف کے باوجود یہ ریس مکمل کی، جبکہ نوشیروان علی نے اپنی کامیابی کو اپنی فیملی اور دوستوں کے نام کیا جنہوں نے مشکل وقت میں ان کا حوصلہ بڑھایا۔
