سولر صارفین کے لیے بڑی خوشخبری: 25 کلو واٹ تک سولر لائسنس شرط ختم

اسلام آباد (رپورٹ: اردو ڈیسک) پاکستان میں سولر انرجی استعمال کرنے والے چھوٹے صارفین کے لیے حکومت نے ایک بڑا ریلیف فراہم کر دیا ہے۔ وفاقی حکومت نے 25 کلو واٹ سے کم صلاحیت کے سولر سسٹم لگانے والے صارفین کے لیے سولر لائسنس شرط کو مکمل طور پر ختم کر دیا ہے۔

وفاقی وزیر اویس لغاری کی ہدایت پر نیپرا نے پاور ڈویژن کی درخواست منظور کر لی

تفصیلات کے مطابق وفاقی وزیر توانائی اویس لغاری کی خصوصی ہدایت پر پاور ڈویژن نے نیشنل الیکٹرک پاور ریگولیٹری اتھارٹی (نیپرا) کو ایک درخواست ارسال کی تھی، جس میں موقف اختیار کیا گیا تھا کہ 25 کلو واٹ یا اس سے کم نیٹ میٹرنگ والے صارفین کو لائسنس کی پیچیدگیوں سے آزاد کیا جائے۔

نیپرا نے اس درخواست کو منظور کرتے ہوئے باقاعدہ نوٹیفیکیشن جاری کر دیا ہے۔ اس فیصلے کے بعد اب نیٹ میٹرنگ کے حامل وہ تمام صارفین جن کا سسٹم 25 کلو واٹ تک ہے، انہیں کسی قسم کے لائسنس کی ضرورت نہیں ہوگی۔ حکام کے مطابق اس نئے قانون کا اطلاق 9 فروری 2026 سے ہو چکا ہے۔ اس اقدام کا مقصد ملک میں متبادل توانائی کے فروغ اور عام صارفین پر بوجھ کم کرنا ہے۔