لندن: بھٹو زرداری خاندان کی نایاب یکجائی، آصفہ کی آمد متوقع
لندن (ویب ڈیسک): پاکستان پیپلز پارٹی کے چیئرمین بلاول بھٹو زرداری اور بھٹو زرداری خاندان کے دیگر افراد کی لندن میں موجودگی کے باعث خاندان کا ایک اہم اجتماع متوقع ہے۔ ذرائع کے مطابق بلاول بھٹو زرداری یورپ کے مختلف ممالک کے دورے مکمل کرنے کے بعد لندن پہنچ گئے ہیں، جہاں ان کی اپنے والد اور صدرِ مملکت آصف علی زرداری سے ملاقات اور قیام متوقع ہے۔
ذرائع کے مطابق بلاول بھٹو زرداری نے لندن آمد سے قبل تقریباً ایک ہفتہ آسٹریا میں قیام کیا، جس کے بعد وہ مختصر دورے پر پیرس گئے اور وہاں سے لندن پہنچے۔
دوسری جانب بختاور بھٹو زرداری بھی اپنے شوہر محمود چوہدری اور بچوں کے ہمراہ پہلے ہی لندن میں موجود ہیں، جہاں وہ خاندان کے دیگر افراد کے ساتھ وقت گزار رہی ہیں۔
صدرِ مملکت آصف علی زرداری بھی لندن میں موجود ہیں۔ ذرائع کے مطابق ان کے طبی معائنے کے علاوہ مختلف شخصیات سے ملاقاتیں بھی متوقع ہیں۔
آصفہ بھٹو کی بھی لندن آمد متوقع
ذرائع کا کہنا ہے کہ بھٹو زرداری خاندان کے اس اجتماع میں شرکت کے لیے آصفہ بھٹو زرداری کی بھی آئندہ چند روز میں لندن آمد متوقع ہے۔ اس طرح خاندان کے تینوں بہن بھائی اپنے والد آصف علی زرداری کے ساتھ لندن میں موجود ہوں گے۔
تقریباً ایک ہفتے تک قیام کا امکان
ذرائع کے مطابق بھٹو زرداری خاندان کے لندن میں اس اجتماع کا سلسلہ تقریباً ایک ہفتے تک جاری رہنے کا امکان ہے۔ اگرچہ خاندان کے افراد کی لندن میں موجودگی کو بنیادی طور پر نجی اور خاندانی مصروفیات سے جوڑا جا رہا ہے، تاہم پیپلز پارٹی کی اعلیٰ قیادت کی ایک ہی شہر میں موجودگی کے باعث سیاسی حلقوں میں بھی اس پیش رفت پر توجہ دی جا رہی ہے۔
تاہم ذرائع کے مطابق لندن میں خاندان کے افراد کی ملاقاتوں اور قیام کا بنیادی مقصد خاندانی وقت گزارنا ہے، جبکہ سیاسی سرگرمیوں کے حوالے سے کوئی باضابطہ تفصیلات سامنے نہیں آئی ہیں۔
