نئی تاریخ رقم: پاکستانی نژاد فٹبالر زیڈان اقبال فیفا ورلڈکپ 2026 میں شرکت کے لیے تیار
عراق کی قومی فٹبال ٹیم کے مڈفیلڈر زیڈان اقبال فیفا ورلڈکپ 2026 میں شرکت کے ساتھ ایک منفرد تاریخ رقم کرنے جا رہے ہیں۔ وہ فیفا ورلڈکپ کے میگا ایونٹ میں کھیلنے والے پہلے پاکستانی نژاد فٹبالر ہوں گے، جس پر دنیا بھر میں موجود پاکستانی کمیونٹی انتہائی خوشی اور فخر کا اظہار کر رہی ہے۔
مانچسٹر یونائیٹڈ سے ورلڈکپ تک کا سفر
23 سالہ زیڈان اقبال انگلینڈ کے شہر مانچسٹر میں پیدا ہوئے۔ ان کی والدہ عراقی جبکہ والد کا تعلق پاکستان سے ہے۔ انہوں نے فٹبال کا آغاز مقامی کلب سے کیا اور بعد ازاں انگلش فٹبال کلب مانچسٹر یونائیٹڈ کی مشہور اکیڈمی میں شمولیت اختیار کی۔
واضح رہے کہ 2021 میں وہ مانچسٹر یونائیٹڈ کی پہلی ٹیم کے لیے میدان میں اترنے والے پہلے برطانوی جنوبی ایشیائی کھلاڑی بنے تھے، جو کہ خود ایک بڑا اعزاز تھا۔
Zidane Iqbal on Becoming the First Pakistani to Play at the FIFA World Cup#PakistanFootball pic.twitter.com/faUdnPLmlW
— Daily Pakistan Football (@pak_futball) June 8, 2026
"تاریخ رقم کرنے کا کبھی سوچا نہ تھا”
ایک حالیہ انٹرویو میں زیڈان اقبال نے اپنے جذبات کا اظہار کرتے ہوئے کہا:
"جب مجھے معلوم ہوا کہ میں ورلڈ کپ میں شرکت کرنے والا پہلا پاکستانی نژاد فٹبالر ہوں گا تو میں حیران رہ گیا۔ بچپن میں، میں صرف فٹبال کھیلنے اور اس سے لطف اندوز ہونے کے بارے میں سوچتا تھا، تاریخ رقم کرنے کے بارے میں نہیں۔”
والد کی خواہش اور عراق کی نمائندگی
زیڈان نے اپنے والد کے حوالے سے ایک دلچسپ اور جذباتی بات بھی شیئر کی۔ انہوں نے بتایا کہ ان کے والد ان کی اس کامیابی پر بے حد فخر کرتے ہیں اور عراق کی نمائندگی کے فیصلے کی مکمل حمایت کرتے ہیں؛ تاہم، اگر وہ پاکستان کی نمائندگی کرتے تو ان کے والد شاید اور زیادہ خوش ہوتے۔
فیفا ورلڈکپ 2026 میں زیڈان اقبال کی شرکت نہ صرف عراق بلکہ دنیا بھر میں موجود پاکستانی نژاد فٹبال شائقین کے لیے بھی ایک یادگار اور تاریخی لمحہ ثابت ہوگی۔
