اسرائیل میں شہد کی مکھیوں کا ‘لشکر’ نمودار: سوشل میڈیا پر ‘قدرتی سزا’ اور ‘آسمانی نشانی’ کی بحث چھڑ گئی

نیتیووت/تل ابیب: اسرائیل کے مختلف شہروں، بالخصوص جنوبی شہر نیتیووت میں شہد کی مکھیوں کے بڑے جھنڈ اچانک نمودار ہونے سے خوف و ہراس پھیل گیا۔ سوشل میڈیا پر وائرل ہونے والی ویڈیوز میں دیکھا جا سکتا ہے کہ ہزاروں مکھیاں بازاروں اور گھروں کے گرد منڈلا رہی ہیں، جس کے بعد حکام کو شہریوں کو گھروں میں رہنے کی ہدایت جاری کرنا پڑی۔

رپورٹس کے مطابق اس غیر معمولی واقعے نے نہ صرف عوامی زندگی کو مفلوج کیا بلکہ ایک فوجی طیارے کو بھی اڑان بھرنے سے روک دیا۔ مکھیوں کا ایک بڑا غول طیارے کے انجن کے قریب جمع ہو گیا، جس کی وجہ سے فنی خطرات کے پیشِ نظر پرواز منسوخ کرنی پڑی۔ عینی شاہدین نے اس منظر کو "قیامت خیز” قرار دیا ہے۔

ان ویڈیوز کے وائرل ہوتے ہی انٹرنیٹ صارفین نے اسے مختلف زاویوں سے دیکھنا شروع کر دیا ہے۔ کئی صارفین اسے بائبل میں بیان کردہ واقعات اور قدیم مذہبی حوالوں سے جوڑتے ہوئے اسرائیل کے لیے "آسمانی تنبیہ” یا "قدرتی سزا” قرار دے رہے ہیں۔ صارفین کا کہنا ہے کہ یہ منظر قدرت کی طرف سے ایک بڑا اشارہ ہے۔

دوسری جانب ماہرینِ شہد بانی (Beekeepers) اس واقعے کو مکمل طور پر سائنسی اور قدرتی عمل قرار دے رہے ہیں۔ ماہرین کا کہنا ہے کہ بہار کے آغاز اور گرم موسم میں مکھیاں اپنی ملکہ کے ساتھ نئی جگہ کی تلاش میں نکلتی ہیں جسے سائنسی اصطلاح میں ‘Swarming’ کہا جاتا ہے۔ ان کے مطابق یہ مکھیاں عام طور پر حملہ آور نہیں ہوتیں بلکہ محض عارضی قیام کے لیے جمع ہوتی ہیں۔

رپورٹ: ادارہ اردو ڈیسک | ماخذ: UrduDesk.com