’میں نے اپنا ملک چھوڑا ہے، بیچا نہیں‘: بھارتی شہریت کی پیشکش پر گلوکار سجاد علی کا دوٹوک جواب

لاہور (اردو ڈیسک): پاکستان کے لیجنڈری گلوکار سجاد علی نے اپنی حب الوطنی سے ایک بار پھر مداحوں کے دل جیت لیے۔ سوشل میڈیا پر وائرل ہونے والی رپورٹس کے مطابق، سجاد علی کو ماضی میں بھارتی شہریت کی پیشکش کی گئی تھی جسے انہوں نے یہ کہہ کر ٹھکرا دیا کہ انہوں نے اپنا ملک صرف چھوڑا ہے، بیچا نہیں ہے۔

ڈکیتی کا واقعہ اور بیرون ملک منتقلی

ذرائع کے مطابق سجاد علی کے ایک قریبی دوست نے حالیہ پوڈ کاسٹ میں انکشاف کیا کہ کراچی میں پیش آنے والے ایک افسوسناک ڈکیتی کے واقعے نے گلوکار کو دلبرداشتہ کر دیا تھا، جس کے بعد انہوں نے پاکستان چھوڑنے کا فیصلہ کیا۔ وہ گزشتہ چند برسوں سے لاس اینجلس، کیلیفورنیا میں مقیم ہیں۔

بھارتی شہریت کی پیشکش اور تاریخی جواب

انکشاف کیا گیا ہے کہ جب سجاد علی دبئی میں موجود تھے، تو ایک بھارتی اہلکار نے ان سے رابطہ کیا اور انہیں بھارت کی شہریت لینے کی پیشکش کی۔ اس موقع پر سجاد علی نے کسی ہچکچاہٹ کے بغیر دوٹوک الفاظ میں جواب دیا:

"میں نے اپنا ملک چھوڑا ہے، بیچا نہیں ہے۔”

عالمی سطح پر مقبولیت

سجاد علی 90ء کی دہائی سے موسیقی کی دنیا پر راج کر رہے ہیں۔ ان کی فنکارانہ صلاحیتوں کا اعتراف نہ صرف پاکستان بلکہ سرحد پار بھی کیا جاتا ہے۔ حال ہی میں مشہور بھارتی پنجابی گلوکار دلجیت دوسانجھ نے بھی عوامی سطح پر سجاد علی کی گلوکاری کی تعریف کرتے ہوئے خود کو ان کا مداح قرار دیا تھا۔

سجاد علی کے اس بیان کو سوشل میڈیا پر خوب سراہا جا رہا ہے اور مداح اسے سچی حب الوطنی کی ایک عظیم مثال قرار دے رہے ہیں۔