ٹیکنالوجی کمپنیوں کی ذمہ داری اور سیکیورٹی: اوپن اے آئی کا بڑا اعتراف

ویب ڈیسک 26 اپریل 2026

ٹمبلر رڈج: آرٹیفیشل انٹیلیجنس کے معروف ادارے ‘اوپن اے آئی’ کے سربراہ سیم آلٹمین نے کینیڈا میں پیش آنے والے فائرنگ کے ایک ہولناک واقعے کے تناظر میں اپنی کمپنی کی بڑی غلطی کا اعتراف کر لیا ہے۔ سیم آلٹمین کا کہنا ہے کہ کمپنی کو حملہ آور کی مشتبہ سرگرمیوں سے متعلق قانون نافذ کرنے والے اداروں کو بروقت آگاہ کرنا چاہیے تھا۔

تفصیلات کے مطابق، 10 فروری کو کینیڈا کے علاقے ٹمبلر رڈج میں 18 سالہ نوجوان جیسی وان نے اندھا دھند فائرنگ کر کے 8 افراد کو قتل کر دیا تھا، جن میں اس کی اپنی والدہ، سوتیلا بھائی اور اسکول کے طلبہ شامل تھے۔ واقعے کے بعد حملہ آور نے خودکشی کر لی تھی۔

تحقیقات سے معلوم ہوا ہے کہ حملہ آور کا چیٹ جی پی ٹی اکاؤنٹ جون 2025 میں ہی معطل کر دیا گیا تھا کیونکہ وہ اس ٹیکنالوجی کو پرتشدد مقاصد کے لیے استعمال کرنے کی کوشش کر رہا تھا۔ اوپن اے آئی نے اس وقت اسے "فوری خطرہ” نہ سمجھتے ہوئے پولیس کو اطلاع نہیں دی تھی۔

سیم آلٹمین نے اپنے حالیہ خط میں متاثرہ خاندانوں سے تعزیت کرتے ہوئے کہا، "ہمیں اس اکاؤنٹ کی معطلی پر حکام کو مطلع کرنا چاہیے تھا، جس پر ہمیں گہرا افسوس ہے۔” برٹش کولمبیا کے وزیر اعلیٰ ڈیوڈ ای بے کی جانب سے شدید احتجاج اور وضاحت طلب کیے جانے کے بعد کمپنی نے اپنی پالیسیوں پر نظرثانی کا وعدہ کیا ہے۔ ماہرین اس واقعے کو ٹیک کمپنیوں کی اخلاقی ذمہ داریوں کے حوالے سے ایک اہم موڑ قرار دے رہے ہیں۔