ایران کے ساتھ ڈیل کا عمل مثبت انداز میں جاری، مذاکرات ویک اینڈ پر بھی ہوں گے: صدر ٹرمپ

واشنگٹن/ایریزونا: امریکی صدر ڈونلڈ ٹرمپ نے ایران کے ساتھ جاری مذاکرات کے حوالے سے اہم پیش رفت کا اعلان کرتے ہوئے کہا ہے کہ ڈیل کا عمل انتہائی خوش اسلوبی سے آگے بڑھ رہا ہے اور اس سلسلے میں بات چیت کا سلسلہ ویک اینڈ کے دوران بھی منقطع نہیں ہوگا۔

ایریزونا میں ایک تقریب سے خطاب کرتے ہوئے صدر ٹرمپ نے واضح کیا کہ مجوزہ معاہدے کے تحت ایران سے ایٹمی مواد واپس لایا جائے گا اور امریکہ ایرانی ‘نیوکلیئر ڈسٹ’ (Nuclear Dust) حاصل کرے گا۔ انہوں نے دو ٹوک الفاظ میں کہا کہ ایران کو کسی بھی صورت جوہری ہتھیار رکھنے کی اجازت نہیں دی جائے گی۔ صدر نے یہ بھی واضح کیا کہ اس ڈیل کے نتیجے میں کسی قسم کا مالی تبادلہ یا رقم کی ادائیگی شامل نہیں ہوگی۔

اپنی تقریر کے دوران امریکی صدر نے جنوبی ایشیا میں پاکستان کے کلیدی کردار کو سراہتے ہوئے وزیراعظم شہباز شریف اور فیلڈ مارشل عاصم منیر کا خصوصی شکریہ ادا کیا۔ صدر ٹرمپ نے دونوں پاکستانی رہنماؤں کو "زبردست شخصیات” قرار دیتے ہوئے کہا کہ انہوں نے اس عمل میں نہایت اہم کردار ادا کیا ہے جس پر وہ ان کے شکر گزار ہیں۔

صدر ٹرمپ نے مشرقِ وسطیٰ کے دیگر ممالک بالخصوص سعودی عرب، قطر، کویت، متحدہ عرب امارات اور بحرین کے تعاون کی بھی تعریف کی۔ انہوں نے کہا کہ ان تمام ممالک نے اس نازک مرحلے پر غیر معمولی حوصلے اور تعاون کا مظاہرہ کیا، جو خطے میں امن کے قیام کے لیے ناگزیر ہے۔

مزید تفصیلات کے لیے وزٹ کریں: UrduDesk.com