متحدہ عرب امارات : پاکستانیوں کے لیے وزٹ ویزوں کا اجراء دوبارہ شروع

اسلام آباد / دبئی (ویب ڈیسک): متحدہ عرب امارات (UAE) نے پاکستانی شہریوں کے لیے وزٹ ویزوں کے اجراء کا سلسلہ باقاعدہ طور پر دوبارہ شروع کر دیا ہے۔ ویزا درخواستیں اب رجسٹرڈ ٹریول ایجنٹس کے ذریعے جمع کرائی جا سکیں گی، جس کے بعد گزشتہ کئی ماہ سے جاری سفری غیر یقینی اور تشویش کی لہر کا خاتمہ ہو گیا ہے۔

اس مثبت پیشرفت کی تصدیق پاکستان میں متحدہ عرب امارات کے سفارتخانے کے ذمہ دار اہلکار اور پاکستان کی سفری صنعت (ٹریول انڈسٹری) کے نمائندوں نے کی ہے۔

فیملی ویزا کی پروسیسنگ میں نمایاں تیزی

امیگریشن امور سے وابستہ اعلیٰ عہدیداروں کے مطابق اس فیصلے سے سب سے بڑا فائد اور راحت ان خاندانوں (فیملیز) کو ملی ہے جن کی درخواستیں پچھلے کئی ماہ سے التواء کا شکار تھیں۔ حکام کے مطابق پہلے جن درخواستوں کو طویل انتظار اور سخت جانچ پڑتال سے گزرنا پڑتا تھا، اب ان پر نسبتاً تیز رفتار اور شفاف طریقے سے کارروائی کی جا رہی ہے۔

پاک امارات تعلقات اور ترسیلاتِ زر میں اہمیت

واضح رہے کہ متحدہ عرب امارات کو تقریباً 18 لاکھ سے زائد پاکستانیوں کا دوسرا گھر تصور کیا جاتا ہے۔ امارات میں مقیم یہ بڑی پاکستانی برادری نہ صرف دونوں ممالک کے دیرینہ اور دوستانہ تعلقات کی ضامن ہے، بلکہ یہ ملک کے لیے ترسیلاتِ زر (Foreign Remittances) کا بھی ایک سب سے بڑا اور اہم ذریعہ ہے۔

زائرین اور مسافروں کا دیرینہ مسئلہ حل

حالیہ مہینوں کے دوران پاکستان سے امارات سفر کرنے کے خواہشمند شہریوں، کاروباری افراد اور اپنے پیاروں سے ملنے کے منتظر خاندانوں کی جانب سے ویزا کے اجراء میں تاخیر اور نامعلوم وجوہات پر درخواستیں منسوخ ہونے کی متعدد شکایات سامنے آ رہی تھیں۔ نئے اقدامات کے بعد سفری ایجنسیوں نے ویزا پروسیسنگ کی بحالی پر اطمینان کا اظہار کیا ہے اور توقع ظاہر کی ہے کہ ان اقدامات سے دونوں ممالک کے مابین عوامی اور تجارتی رابطوں میں مزید بہتری آئے گی۔