فیفا ایشین کپ: پاکستان کی شاندار واپسی، فلپائن کے خلاف میچ 2-2 سے برابر

لاہور: پاکستان فٹ بال ٹیم نے تاریخی کارکردگی کا مظاہرہ کرتے ہوئے فیفا ایشین کپ میں فلپائن کے خلاف دو گول کے خسارے سے شاندار کم بیک کیا اور میچ 2-2 سے برابر کر کے ٹورنامنٹ میں اپنا پہلا قیمتی پوائنٹ حاصل کر لیا۔

منگل کے روز کھیلے گئے اس سنسنی خیز مقابلے میں پاکستان کی جانب سے علی اکبر خان اور عبدالصمد ارشد نے گول اسکور کیے۔ فیفا کے کسی بھی مقابلے میں پاکستان کی یہ پہلی شرکت ہے، اور اس میچ کے ذریعے قومی ٹیم نے اس سطح پر اپنے پہلے گول اسکور کرنے کا اعزاز بھی حاصل کیا۔

میچ کا احوال: ہیڈ کوچ نولبرٹو سولانو کی ٹیم کو گروپ بی کے پہلے میچ میں تھائی لینڈ کے خلاف شکست کا سامنا کرنا پڑا تھا، تاہم فلپائن کے خلاف قومی کھلاڑیوں نے بھرپور عزم کا مظاہرہ کیا۔ میچ کے ابتدائی لمحات میں فلپائن نے دباؤ بنائے رکھا اور 24ویں منٹ میں سینڈرو ریز کے گول کی بدولت برتری حاصل کر لی۔

پہلے ہاف کے اختتام سے قبل محمد فضل کے پنالٹی ایریا میں ہاتھ سے گیند لگنے پر فلپائن کو پنالٹی ملی، جسے بیورن کرسٹنسن نے گول میں بدل کر برتری کو دگنا کر دیا۔

شاندار دوسرا ہاف اور فیصلہ کن کم بیک: پہلے ہاف میں دو گول کے خسارے کے بعد کوچ نولبرٹو سولانو نے ٹیم میں اہم تبدیلیاں کیں۔ دوسرے ہاف کے آغاز کے صرف دو منٹ بعد کپتان عبداللّٰہ اقبال کے پاس پر علی اکبر خان نے شاندار انداز میں فلپائن کے گول کیپر کیون مینڈوزا کی ٹانگوں کے درمیان سے گیند نکال کر پاکستان کے لیے اپنا پہلا بین الاقوامی گول اسکور کیا۔ یہ قومی ٹیم کے لیے بھی اس ٹورنامنٹ کا پہلا گول تھا۔

کھیل کے دوران پاکستان نے مسلسل حملے جاری رکھے اور 61ویں منٹ میں عبدالصمد ارشد نے دائیں جانب سے شاندار پیش قدمی کرتے ہوئے گیند کو جال میں پہنچا دیا اور پاکستان کو 2-2 کی برابری دلادی۔ یہ عبدالصمد کا قومی ٹیم کے لیے دوسرا بین الاقوامی گول تھا۔

میچ کے آخری لمحات میں دونوں ٹیموں نے برتری حاصل کرنے کی پوری کوشش کی، تاہم دفاعی لائن کی مستعدی اور گول کیپر یوسف بٹ کی شاندار کارکردگی کی بدولت مزید کوئی گول نہ ہو سکا اور مقابلہ 2-2 پر ختم ہوگیا۔ اس ڈرا کے ساتھ ہی پاکستان نے ٹورنامنٹ میں اپنے پوائنٹس کا کھاتہ کھول لیا ہے۔