سعودی عرب کی تاریخی دریافت: 1300 سال پرانی قدیم مسجد کی دیوار پر درود و سلام ثبت

**ریاض (خصوصی رپورٹ)** — سعودی عرب کی ہیئت التراث (Saudi Heritage Commission) نے الباحة علاقے کے المعلّمة (Al-Ma’mala) آثار قدیمہ سائٹ پر پہلی صدی ہجری کی ایک مسجد دریافت کر لی ہے، جو 1300 سال سے زائد قدیم ہے۔

مسجد مغربی جانب واقع ہے اور گرانائٹ کے تراشے ہوئے پتھروں سے تعمیر کی گئی ہے۔ اس کی لمبائی شمال سے جنوب تقریباً 16 میٹر اور مشرق سے مغرب تقریباً 10 میٹر ہے۔ مسجد کے اندر اور باہر دونوں جانب اسلامی نقوش موجود ہیں، جبکہ قبلہ کی دیوار پر ایک اہم تاریخی کتبہ ملا ہے جس میں اللہ تعالیٰ کا ذکر، نبی کریم حضرت محمد ﷺ پر درود و سلام اور نیک لوگوں کے لیے دعائیں درج ہیں۔ یہ تحریر صدیاں گزرنے کے باوجود محفوظ حالت میں ہے۔

ماہرین آثار قدیمہ کے مطابق یہ دریافت ابتدائی اسلامی دور میں خطے کے مذہبی، تہذیبی اور تعمیراتی ورثے کو سمجھنے کے لیے غیر معمولی اہمیت رکھتی ہے۔ المعلّمة سائٹ ایک قدیم کان کنی کی آبادی تھی جہاں سونے، چاندی اور تانبے کی کان کنی ہوتی تھی۔ لیباریٹری تجزیوں سے پتا چلا ہے کہ یہاں کان کنی کا کام قبل از اسلام سے شروع ہو کر نویں صدی عیسوی تک جاری رہا۔

یہ کھدائی چوتھے سیزن کے دوران کی گئی، جس میں مسجد کے ساتھ چند ملحقہ پتھریلے کمرے بھی ملے جو ذخیرہ اندوزی اور سماجی مقاصد کے لیے استعمال ہوتے تھے۔

یہ دریافت سعودی عرب کی اسلامی تاریخ کے ابتدائی دور کی تعمیرات اور مذہبی زندگی کی اہم کڑی ثابت ہو رہی ہے۔