اکشے کمار کا اپنے بیٹے آرو بھاٹیا سے متعلق بڑا انکشاف: ’وہ فلموں میں نہیں آنا چاہتا‘

ممبئی: (اردو ڈیسک ویب ڈیسک) بالی ووڈ کے ’کھلاڑی‘ اور اسٹار اداکار اکشے کمار نے اپنے 24 سالہ بیٹے آرو بھاٹیا کے مستقبل کے حوالے سے دو بڑے اور حیران کن انکشافات کیے ہیں۔ 58 سالہ اداکار نے واضح کیا ہے کہ ان کا بیٹا اپنے والد کے نقشِ قدم پر چلتے ہوئے فلمی دنیا کا حصہ بننے میں کوئی دلچسپی نہیں رکھتا۔

ایک حالیہ انٹرویو میں گفتگو کرتے ہوئے اکشے کمار نے بتایا کہ آرو بھاٹیا کا فلموں میں آنے کا کوئی ارادہ نہیں ہے، بلکہ وہ فیشن کے شعبے میں اپنا کیریئر بنانے کے لیے سخت محنت کر رہا ہے۔ اکشے کے مطابق، ان کا بیٹا اس وقت فیشن ڈیزائننگ اور پرنٹس کی باریکیاں سیکھ رہا ہے۔

اداکار نے ایک دلچسپ انکشاف یہ بھی کیا کہ آرو اس وقت بالکل نچلی سطح (Ground level) پر کام سیکھ رہا ہے اور اس کی ماہانہ آمدن محض 4500 روپے ہے۔ اکشے کمار نے کہا کہ وہ اپنے بیٹے پر کسی قسم کا دباؤ نہیں ڈالتے اور نہ ہی اسے طویل لیکچر دیتے ہیں، بلکہ وہ چاہتے ہیں کہ آرو اپنی زندگی اپنے طریقے سے گزارے۔ ان کی بنیادی نصیحت صرف یہ ہے کہ "کسی کو نقصان نہ پہنچاؤ”۔

اکشے کمار کا کہنا تھا کہ وہ اور ان کا بیٹا کافی حد تک ایک جیسے ہیں۔ آرو بھی اپنی صحت کے معاملے میں بہت سنجیدہ ہے اور وہ نہ صرف قد آور ہے بلکہ اپنے کام کے حوالے سے بہت زیادہ فوکسڈ (Focused) بھی ہے۔

یاد رہے کہ 2002 میں پیدا ہونے والے آرو بھاٹیا اس وقت لندن سے اعلیٰ تعلیم حاصل کر رہے ہیں اور وہ میڈیا کی نظروں سے دور ’لو پروفائل‘ رہنا پسند کرتے ہیں۔

دوسری جانب، اکشے کمار ان دنوں اپنی نئی فلموں کی وجہ سے خبروں میں ہیں۔ حال ہی میں ان کی فلم ’بھوت بنگلہ‘ ریلیز ہوئی ہے، جبکہ مداحوں کو ان کی اگلی بڑی فلم ’ویلکم ٹو دی جنگل‘ کا بے صبری سے انتظار ہے۔